KALIBO, Aklan—Naging madinaeag-on ag nag-abot sa kabilugan nga 151 ro nailistang successfull blood donor sa bag-o eamang natapos nga Dugong Bombo 2024 nga may temang: A Little Pain, A Life to Gain.
Raya ro naging assessment it Philippine Red Cross ukon PRC Aklan Chapter .
Suno kay Mary Joe Galleon, administrator it PRC Aklan Chapter nga naging maayos ro pagpatigayon it Dugong Bombo ko Sabado nga adlaw , Nobyembre 16 sa Gaisano Grand Mall Kalibo.
Temprano suno kana nga nag-agto sa venue ro mga gustong magpasakop , apang may iba nga owa ginswerte ag owa naboe-an it dugo bangud sa manaba nga hemoglobin kara.
Ro mga nag donate it dugo hay halin sa nagkaeain-eain nga mga banwa sa Aklan , kapulisan, mga estudyante , ag iba pa .
Angot kara, gin engganyo ni Galleon ro mga pumueuyu nga mag donate it dugo kada tatlong buean agud nga mapabilin nga bastante ro supply ag makabulig sa isigkatawo nga nagakinahangean kara.
Tuyo it dag-unan nga Dugong Bombo nga makatipon it dugo nga ginakinahangean it mga pasyente nga nagapaidaeum sa blood transfusion, dialysis ag iba pa.
Sa pihak nga parte, hantup sa tagipusuon nga ginapasaeamatan it Bombo Radyo Kalibo ro tanan nga mga donors, partners, sponsors, ag volunteers nga owa it pagduha-duha nga nagbulig agud nga maging madinaeag-on ro Dugong Bombo.
