Nakataeana sa Oktobre 6 ro tentative schedule para sa soft opening it bag-ong building it Kalibo slaughterhouse nga nakadesinyo nga maging double A standard.
Suno kay Municipal Economic Enterprise and Development Office ukon MEEDO head Mary Gay Joel, ro nasambit nga edipisyo hay human eon ag target nga magiging fully operational sa dag-on 2023 sa oras nga mabaton ro accreditation bilang double A standard ag ginahandom pa nga maging triple A sa mga masunod nga dinag-on.
Ro nasambit nga edipisyo hay kaiping eamang it naga-eksister nga slaughterhouse ag ro lokal nga gobyerno ro nag-ambag sa eogta apang ro kabilugan it construction hay ginpatigayon it pribadong sector sa idaeom it public-private-partnership agreement kon siin kapin sa 28 anyos ro kontrata.
Ginpaathag nga may share percentage sa operation ro LGU sa unang limang dag-on.
Raya eon ro ikaywang slaughterhouse nga double A standard sa bilog nga probinsya it Aklan nga ginpangunahan it banwa it Ibajay.
Tuyo kara nga masiguro ro kalimpyo it mga karne nga ginakatay ag ginabaligya sa merkado.
Mag-eowas kara, inde eon kasueod sa banwa it Kalibo ro mga karne kon bukon manlang it halin sa double A standard nga slaughterhouse
