KALIBO, Aklan—Uman nga ginpadumdum it Banga Police Station sa mga nagapamasada nga tricycle drivers ro angot sa mandatory nga pagsuksok it andang uniform.
Suno kay P/Capt. Benny Jones Mendoza, hepe it Banga PNP nga raya ro anang unang nataeupangdan sa anang pagpungko sa pwesto.
Gin-insister kara nga base sa traffic ordinance it munisipyo, required ro mga tricycles drivers nga nagabiyahe sa nagkaeain-eain nga barangay sa Banga nga magsuksok it uniporme.
Tuyo sigon kara nga maging presentabli ro mga drivers kamana man nga madali nga matumod kon lehitimo sanda nga nagapamasada ukon mga colorum.
Sa pihak nga parte, hugut man nanda nga ginapatuman ro polisiya sa pagsuksok it face shield ag face mask sa mga driver ag pasahero it mga tricycle.
Paga-isyuhan it citation ticket nga may multa nga kapin sa P1,000 sa sin-o man nga maga-eabag nga driver sa andang banwa ag disobedience sa mga pasahero nga indi magasunod sa face shield wearing policy.
Agud nga ma-remind suno kana ro mga pasahero, dapat nga magbutang it karatola sa saeakyan nga “no faceshield, no ride policy”.
Nag apela man imaw sa publiko nga magsunod sa ginapatuman nga health protocols bilang proteksyon kontra sa coronavirus disease (COVID-19).
