MAKATO, Aklan—Bangud sigon sa away sa maeanahon nga eugta rason nga nabuno ag napatay it sangka eaeaki ro anang 64 anyos nga manghud matapos ro mainitang diskusyon sa katung-anan it inuman sa selebrasyon it kapiestan sa Brgy. Calangcang, Makato, gabi-i it Martes, Oktubre 29 .
Suno kay Danilo Tambong, nag-abot sa andang baeay ro anang manghud nga si Ricardo Tambong nga naka-inom eon.
Samtang naki-tagay hay ginbuksan sigon kara ro istorya angot sa andang maeanahon nga eugta nga owa pa nahueu-eay kanda nga magmaeanghud.
Gin-buslahan sigon imaw kara nga nagahari-harian sa mga produkto it andang eugta.
Kasunod kara, gulpi imaw nga gin-eu-ok it biktima nga anang ginka-pikon rason nga nagbo-oe it siyaw ag makapilang beses nga ginbuno ro anang manghud nga tinamaan sa anang tiyan, ilukon ag likod.
Dead-on-arrival sa ospital ro biktima bangud sa naangkon nga mga madaeum nga igo it pagbuno samtang arestado ag presenteng nakakulong sa custodial facility it Makato Municipal Police Station ro suspek nga parehong residente it nasambit nga lugar ag nagapangatubang sa kasong pagpatay.
Sa pihak nga parte, ginpahayag ni Danilo nga nagahinoesoe man imaw sa nahimo nga krimen eabi pa ag manghud nana ro anang napatay.
Sa pihak nga parte, aminado man si Mrs. Delia Tambong, asawa it suspek nga nakaangkon it pagsinangag ro magmaeanghud samtang naga inuman , apang insigida man nga natapna kun sa siin nagkueupkupan pa sigon sanda nga daywa matapos nga magkaayos.
Owa sigon nana ginaeauman nga magaresulta sa madinuguon nga insidente ro natabu.
