KALIBO, Aklan—Mabahoe ro naging pagpasaeamat it barangay council it Bacan, Banga sa Bombo Radyo ag Provincial Engineering’s Office sa madasig nga aksyon sa ginareklamo nga pirmeng guba nga karsada nga takaw disgrasya sa mga motorista.
Suno kay punong barangay Allen Robelo it Bacan, Banga nga maskin nga owa pa nanda napasa sa provincial government ro andang gin-aprubahan nga resolusyon angot sa nasambit nga problema hay gin-umpisahan eon ro reblocking ag repair it samad nga karsada partikular sa prente it Bacan Elementary School.
Nauna eon nga ginpromisa ni Engr. Edilson Magalit, head it PEO-Aklan sa interview it Bombo Radyo nga paga-umpisahan makaron nga domingo ro pag-ayos it nasambit nga provincial road.
Nasayuran nga haeos limang motorista eon ro naaksidente sa nasambit nga lugar bangud sa mabahoe nga crack sa tunga it karsada.
Kadungan kara, nag apela si kapitan Robelo sa natungdan nga i-regulate ro pag-agi it mga truck halin sa mga quarry site ag sundon ro load limit sa mga ginakarga nga sand and gravel nga sambilo sa mga factor sa pagkasamad it karsada.
Nagpanawagan man imaw sa mga motorista nga magdahan sa pag-agi sa nasambit nga provincial road bangud nga mag-eowas sa barangay Bacan hay maabu nga iba pang lugar hasta sa banwa it Libacao ro naga angkon it uka-uka nga karsada.
