KALIBO, Aklan—Sorpresa para sa barangay council it Mangan, Banga ro pagpanguna sa ranking halin sa siyam nga mga barangay nga nakapasar sa Seal of Good Local Governance for Barangays sa bilog nga probinsiya it Aklan.
Mag-eowas sa Brgy. Mangan, Banga, ro iba pa nga mga barangay nga nakaangkon it SGLGB seal hay ro Lalab, Batan; Mabilo, Kalibo; Poblacion, Kalibo; Banaybanay, Malinao; Dangcalan, Malinao; Bubog, Numancia; Afga, Tangalan ag Jawili, Tangalan.
Suno kay Punong Barangay Relito Revesencio it Mangan, Banga nga ginhimo eamang nana ro anang trabaho kabulig ro iba pang miyembro it konseho ag sangguniang kabataan kamana man nga ginsunod ro mga ginapatrabaho kanda it Department of the Interior and Local Government ukon DILG .
Mabahoe sigon ro andang pagpasaeamat bangud nga ginkilaea ag ginpasidunggan ro andang mga pagtinguha agud nga maging maayos ro pagserbisyo ag pagpadaeagan it andang barangay.
Nauna kara, nagpatigayon it inspeksyon sa mga kabarangayan ro validation team nga ginaeakipan it DILG, Liga ng mga Barangay, Barangay Secretariat ag iba pa.
Agud nga maangkon ro nasambit nga pagkilaea, kinahangean nga ro barangay hay makapasa sa tatlong nagapangunang areas kapareho it Peace and Order, Financial Administration ag Disaster Preparedness.
Bangud nga limitado ro mga resources, aminado si kapitan Revesencio nga bukon eon gid man it haeos perpekto ro andang implementasyon, apang padayun nga nagahimo it mga pamaagi agud nga mapun-an ro mga kakueangan partikular ro pag-angkon it kaugalingon nga material recovery facility ukon MRF bilang pagsunod sa Ecological Solid Waste Management Act of 2000.
Nakikita sigon nana nga 5 to 10 years halin makaron hay magiging problema nanda ro basura sa lugar.
Nasayuran nga raya eon ro ika-ap-at nga termino ni kapitan Revesencio.
