KALIBO, Aklan — Ginkalipay it Bagong Alyansang Makabayan (Bayan-Aklan) ro pag-atubang ni dating Pangueong Rodrigo Duterte sa pagpamati it quad committee angot sa anang war on drugs ko tiempo it anang administrasyon.
Suno kay Kim Sin Tugna, provincial coordinator it Bayan-Aklan nga raya hay mabuhay eon nga ginapangayo it mga progresibong organisasyon partikular it Makabayan bloc sa pageaum nga mataw-an it nagakaigo nga imbestigasyon ag hustisya ro mga biktima it war on drugs umpisa ko 2016.
Haeos 30,000 sigon nga mga drug personalities ro napatay kara ag may iba pang mga inosenteng sibilyan ro nadaeahig.
Dapat suno kana nga pasabton ro dating presidente sa madinuguon nga war on drugs bangud sa anang mga pahayag nga naging rason it paghueag it mga pulis nga pumatay para sa mga reward nga naga-abot sa minilyong piso.
Matsa nakaangkon man sigon it pag-aku sa anang saea si Duterte matapos nga imaw eon mismo ro nag-engganyo sa International Criminal Court nga padasigan ro imbestigasyon.
Mag-eowas sa war on drugs dapat man sigon nga magapanabat ro dating opisyal sa pag-eapnaag it human trafficking bangud sa pagsueod it POGO ag illegal drugs.
Sa pihak nga parte, gindugang pa ni Tugna nga nasaksihan man sa hearing ro pagiging bastos ag kawad-an it respeto ni Duterte kat ginhana nga baywon si dating Senador Leila de Lima ag habyon it microphone si dating Senador Antonio Trillanes IV.
