KALIBO, Aklan—Sa pihak nga ginadudahan nga electrical fire ro rason it sunog nga nag eontad sa boundary it Brgy. Tabayon ag Pagsanjan sa banwa it Banga, nagapadayun pa ro ginapatigayon nga imbestigasyon it Bureau of Fire Protection ukon BFP-Banga.
Suno kay FO2 Clement Catunao, arson investigator it BFP Banga nga tatlong baeay nga himo sa mixed materials ag sangka konkretong baeay nga gin obra nga bodega ro natupok.
Sangka bumbero nga naka assign sa BFP Malay nga naka agi eamang sa lugar ro nag inform kanda.
Napas-eawan sigon nga maka responde ro andang fire truck nga under repair raya.
Sa baylo hay nagpangayo eagi sanda it bulig sa BFP-Kalibo, Estancia sub-station, Numancia ag Balete.
Ugdaw eon sigon ro mga baeay pag-abot nanda sa lugar bangud sa mabaskog nga hangin ag naga-ililiping ro mga raya.
Nagbuhay it haeos 50 minutos antes nga gindeklarang under control ro sunog ag maga alas-7 eon it gabi-i kat owa eon it mga baga sa lugar.
Owa man it naninahan ukon namatay sa sunog.
