KALIBO, Aklan–Kadungan it pag-umpisa it Fire Prevention Month makaron nga buean it Marso, nagpatigayun man it nagkaeain-eain nga aktibidad ro Bureau of Fire Protection (BFP)-Ibajay.
Suno kay SFO3 Rommel Ignacio, Hepe it BFP-Ibajay nga pila sa andang ginkasa nga programa ag aktibidad hay ro motorcade kaibahan ro mga stakeholder, negosyante, PNP ag lokal nga gobyerno it banwa.
Mag-euwas kara, may ginpatigayun man sanda nga clean up drive sa Brgy. Laguinbanwa, feeding program, pagpanao it food packs, coastal clean up, tree planting ag road show kung siin nag-adto sanda sa mga eskwelahan.
Raya sigon hay kaparte it ginpagguwa nga mandato kanda ni CINSP Rowell Limjuco nga magguwa sa komunidad.
Nag-apela man raya sa mga pumueoyo nga maging madahan sa tanan nga kahigayunan agud nga makalikaw sa sunog.
Siguraduhon sigon nga naka-unplug ro mga appliances sa saksakan eabi eon kung nagapanaw it maeayuan.
Nasayuran nga nakalista it waeong ka mga insidente it sunog ro banwa it Ibajay umpisa ko Enero.
Kaeabanan sa naging rason it sunog hay bangud sa electrical short circuit.
