KALIBO, Aklan—Magapatigayon it nagkaeain-eain nga aktibidad ro Bureau of Fire Protection ukon BFP Kalibo kasunod it andang ika-32nd nga anniversary nga may temang “Modernong bombero kaakibat sa ligtas at maunlad na pamayanan”.
Angot kara, ginpatpat ni FO2 Karl Anthony P Iquiña, OIC it Operations Section it BFP Kalibo ro andang mga nakalinyada nga aktibidad.
Suno kana, bilog nga buean it Agosto hay may mga nakataeana sanda nga aktibidad nga gin-umpisahan it misa ko Agosto 1.
Mag-eowas kara, nagpatigayon sanda it blood letting activity para makadugang sa supply it dugo nga eubus nga kinahang-ean eabi eon it mga pasyente nga regular nga may blood transfusion.
Sa pihak kara, bukon eamang it sa kabuhi it tawo ro andang concern kundi maging sa mga kasapatan rason nga ginpatigayon ro fun walk with pets agud nga taw-an ro mga raya it importansya.
Ro BFP hay bukon eamang it sa mga insidente it sunog ro andang partisipasyon kundi maging sa nagkaeain-eain pang insidente ag aksidente sa mga karsadahon.
