All systems go eon ro bilog nga pwersa it Tangalan Municipal Police Station nga magabantay sa kaeowasan it mga pumueuyu nga maga-agto sa baybay ag mga resorts para sa selebrasyon it kapistahan ni Sr. San Juan de Bautista sa Lunes, Hunyo 24.
Ginpahayag ni P/Lt. Owen Andrada, officer in charge it tangalan municipal police station nga nakasumite eon sanda it andang security plan kun sa siin nakipagbueuligan sanda sa lokal nga gobyerno ag mga barangay council.
Haeos tanan nga kapulisan hay maga-duty sa raya nga adlaw ag iga-deploy sa mga estratehiko nga mga lugar partikular sa beach front kabulig ro mga tanod.
Tuyo kara nga mapatuman ro peace and order ag malikawan ro anuman nga untoward incident nga matabu.
Pagatutukan sigon nanda ro mga lugar it Jawili, Dapdap ag iba pa nga kaeabanan nga ginadayo it mga beachgoers.
Sa pihak kara, nagapangayo ro opisyal it kooperasyon sa publiko nga makipagbueuligan pinaagi sa paglikaw sa pagbitbit it mga makamaeatay nga hinganiban ag iba pang bagay nga makasakit kamana man nga hagan-haganon eamang ro pag inom it aeak agud nga ma-enjoy it eubus ro kapistahan.
Mag-eowas sa mga baybayon, ginaeauman ro pagbuhos it mga bisita sa mga kasubaan ag mga resorts nga may swimming pool.
