KALIBO, Aklan—Gin-engganyo it Bureau of Internal Revenue ukon BIR-Aklan ro mga pumueuyu nga may overdue nga baeayran sa buwis nga magsumite it applikasyon agud nga maka-avail it estate tax amnesty program it gobyerno.
Ginpahayag ni revenue district officer Eralyn de Aro it BIR-Aklan nga magapatigayon sanda it serye it mga seminars agud nga eubus nga maintindihan ro may kaangtanan sa revenue regulations nga sakop it tax amnesty applications on delinquencies sa idaeum it Republic Act 11213 ukon tax amnesty act of 2019.
Sa idaeum it nasambit nga kasuguan, ro mga delingkwenteng taxpayers hay pagataw-an it sang dag-on agud nga makadihon it andang aplikasyon para sa amnestiya.
Pagataw-an it kahigayunan ro mga delingkwenteng taxpayer nga i-update ukon limpyuhan ro andang tax payment records.
Sakop it kasuguan ro tanan nga national taxes-capital gains tax, documentary stamp tax, donor’s tax, excise tax, income tax, percentage tax, value-added tax (VAT) ag withholding tax para sa nagtaliwan nga buwis hasta ko 2017.
