Ginpunggan it kaeabanan it miyembro it House Committee on Justice ro pagbukas it kahon nga may sueod nga tax returns ni Vice President Sara Duterte ag anang asawa nga si Atty. Manases Carpio.
Sa botohan makaron nga adlaw it Miyerkules, 38 miyembro ro bumoto kontra sa pagbukas it kahon, samtang an-om eon lang ro pumabor.
Suno sa Bureau of Internal Revenue (BIR), ro mga nasambit nga dokumento hay pwede eamang buksan “in aid of legislation” ag sa executive session ag bukon it sa public hearing.
Bangud kara, nagapabilin nga sealed ro kahon nga ginsumite it ahensya ko nagtaliwan nga dominggo.
Ginpahayag ni Deputy Minority Leader Chel Diokno nga bastante eon ro ebidensiya agud makataeana it probable cause para sa impeachment ni Duterte maskin inde pagbuksan ro kahon.
Suno kana, mas mayad nga hueaton ro Senado bilang impeachment court nga magdesisyon kon pagabuksan ro mga dokumento, bilang pagdahan.
Pumabor sanday Deputy Speaker Janette Garin ag Rep. Benny Abante, nga naghambae nga ro Kamara hay bukon pa it impeachment court, kundi nagapatigayon eamang it preliminary investigation.
Ginbatikos mat-a ni Senior Deputy Majority Leader Lawrence Defensor ro desisyon ag gintawag raya nga “betrayal of public trust.”
Gin-insister nana nga ro inde pagbukas it kahon hay matsa pagtakop sa kamatuoran.
Sa pihak nga parte, ginpahayag ni Senior Deputy Minority Leader Leila de Lima nga ro Constitution ro dapat magpangibabaw sa anumang laye kaparehas it National Internal Revenue Code (NIRC), ag inde dapat limitahan ro gahom it komite.
