KALIBO, Aklan—Ginpaeawig eon it Philippine Coast Guard (PCG)-Aklan ro biyahe it mga motorbanca paagto ag paguwa it isla it Boracay.
Raya hay base sa abiso ni Aklan Governor Florencio Miraflores matapos nga ginpaidaeum ro probinsiya it aklan sa Alert Level 2.
Ginkasugtanan it PCG, lokal nga gobyerno it Malay ag Caticlan Boracay Transport Multi-Purpose Cooperative ukon CBTMPC, ro pagbiyahe it mga motorbanca hay umpisa alas-5:00 it agahon hasta alas-10:00 it gabi-i halin sa dating alas-6:00 it agahon halin alas-8:00 it gabi-i.
Sa makaron, amat-amat eon nga nagapanumbalik ro kabaskog it turismo sa isla.
Kapin sa 181,232 eon nga turista ro nailista sa sueod it napueo nga buean umpisa ko enero hasta Oktubre 2021.
Samtang, umpisa nobyembre 1 hasta 8, ro visitors arrival hay nag abot sa 13,134.
Kinahangean sa gihapon nga magpakita it negatibong RT-PCR test results ro mga turista halin sa guwa it isla it Panay ag Guimaras bilang requirement sa pagsueod sa Boracay.
Nauna kara, ginpatag-od eon ro curfew hours sa isla umpisa alas-12 it tungang gabi-i hasta alas-4 it aga-aga umpisa ko Oktubre 29.
