Ginsiguro it Bureau of Jail Management and Penology (BJMP) ro pag-protekta sa kapakanan it mga persons deprived of liberty (PDL) sa tunga it nagataas nga heat index.
Sa sangka pahayag, hinambae ni BJMP chief Jail Director Ruel Rivera nga prayoridad it taeatapan ro pagpabilin nga maayos ro operasyon it mga jail facilities sa pihak it mataas nga temperatura ag mahabang tag-init.
Kadungan kara hay ginsugo eon man it BJMP Chief ro striktong pagpatigayon it mga heat mitigation measure para mabantayan ro ikamayad nga eawas it mga PDL, eabi eon sa National Capital Region (NCR) kun siin mataas ro congestion rate. Naintindihan sigon it BJMP ro kinahangeanon nga makapatigayon it mga proactive intervention para malikawan ag mapunggan ro mga heat-related illnesses ag mapabilin ro kapakanan it mga preso.
Ginsugo man ni Gen. Rivera ro 24/7 nga monitoring it mga jail nurse ag mga health personnel sa mga kulungan para eagi nga makasabat sa mga medical emergencies.
Samtang, bilang pagpahaom sa posibilidad it pagtaas it kaso it mga summer-related illnesses, dati eon man nga ginsugo ni Rivera ro pagbakae it nagakaigo nga mga bueong. Ginpasigurado man it heneral nga maayos ag naga-gana ro mga ventilation shaft, exhaust fan, ag iba pang kagamitan para maging maayos ro pagdaloy it hangin sa sueod it kulungan.
