Ginmultahan it P2.17 milyon it Philippine Competition Commission (PCC) ro Boracay scuba association ag 39 sa mga member-shops kara sa gina-alegar nga pagpasakop sa price fixing sa Boracay.
Ginmandu ro pagpapundo sa multi-year price fixing agreement it Boracay Business Administration of Scuba shops (BBASS) ag mga miyembro kara.
Nasayuran it komisyon nga ro BBASS, sangka non-stock domestic corporation nga gintukod para sa regulasyon ag proteksyon it local diving industry, hay nagsirbing central facilitator para sa price fixing agreement nga nakaapekto sa lokal nga turismo.
Suno sa PCC, raya hay pageabag sa Section 14 it Philippine Competition Act.
Gingamit it grupo ro 2016 rules regulations, kaibahan ro 2018 ag 2019 formal pricing agreements, para boe-on ro market competition.
Sa idaeum it nasambit nga pricing mechanism, ginpatuman it grupo ro minimum floor prices sa mga aktibidad kapareho it P3,000 para sa discover scuba diving sessions, ag hasta sa P25,000 para sa open water diver courses.
Ginbutang man it grupo ro komisyon it mga tour guide, hotel ag booking agent sa 10%, maging ro pagbawae sa mga shop nga magtanyag it incentives sa mga customer kapareho it libreng extra dives, masks, t-shirts, pagkaon ukon mga litrato.
Samtang, ginpamilit man it BBASS ag mga miyembro kara nga ro fixed rates hay nagatuyo nga protektahan ro mga consumer ag masiguro ro stabilized localized livelihoods, ag sayud sigon raya it lokal nga gobyerno.
Sa pihak kara hay owa ginbaton it PCC ro mga argumento ag ginhambae nga ro price fixing hay sangka outright violation it laye ag indi pwedeng ma-justify it economic efficiency ukon industry protection.
Gin-engganyo man it PCC ro lokal nga gobyerno nga magsunod sa mga ordinansa it National Competition Policy agud nga masiguro ro fair ag free market competition sa tourism getaways it nasyon.
Ro nasambit nga tikang hay kaparte sa gihapon it ginpabaskog nga monitoring it PCC para bungkagon ro price fixing agreements ag anti-competitive cartels nga nakaaapekto sa mga consumer.
