Nagpatigayon it clean-up drive operation ro barangay council it Poblacion, Kalibo kabulig ro lokal nga gobyerno ag ro taeatapan ni Aklan second district Congressman Teodorico Haresco sa may C. Laserna St. sa nasambit nga banwa.
Suno kay Punong Brgy. Neil Candelario, ro nasambit nga lugar ro eubus nga naapektuhan it maeapnagon nga pagbaha ko nagtaliwan nga dominggo.
Ro taeatapan ni Kalibo mayor Juris Sucro ag Congressman Haresco hay nagpadaea it power sprayer para mabueo eon ro eotay nga nagkalhit sa mga karsadahon nga daea it baha antes pa man nagpanaeasa si Bagyong Paeng.
Ginpahayag dugang nga kapin sa 110 ka mga indibidwal ro ginbueo it barangay council kon siin ro iba sa mga raya boluntaryo nga gintanyag ro andang serbisyo samtang ro iba hay gintaw-an it foodpacks.
Ginkabuligan nga limpyuhan ro nasambit nga lugar bangud nga posibleng magtuga it masakit ro mga alikabok sa oras nga magmaea it husto ro mga nagsaka nga eotay.
Samtang sa pihak nga parte, may paunang ayuda eon ro barangay council nga foodpacks sa haeos 2,700 affected households ag nagapadayon pa ro andang re-packing makaron para sa dugang nga assistance sa mga apektadong pamilya.
Haeos 90 porsyento suno kana sa Poblacion ro naeobog sa baha ag raya sa makaron ro andang prayoridad nga mataw-an it assistance.
