KALIBO, Aklan—Nagtukod eagi it African Swine Fever ukon ASF checkpoint sa Brgy. Dapdap sa banwa it Tangalan agud nga masiguro nga indi eon makaguwa ro mga alagang baboy it mga residente sa nasambit nga lugar.
Raya hay kasunod it nailistang unang kaso it ASF sa nasambit nga lugar.
Nasayuran nga sa barangay Dapdap, daywa eon lang nga purok idtu ro bukon it infected ag haeos tanan hay may kaso it sakit.
Suno kay agricultural technician Carol Kaye Amacio it LGU-Tangalan nga kaeakip sa ginhimo nga precautionary measures hay ro pagbawae nga makapaguwa it mga alagang baboy sa andang banwa.
Gindugang pa ni Amacio nga nagapadayun ro andang monitoring ag mass testing kun sa siin may mga alagang baboy pa ro nagpositibo sa virus.
Mag-eowas sa barangay Dapdap hay apektado man it sakit ro kaiping nga barangay it Tondog.
Indi pa nanda matumod ro posibleng ginhalinan it ASF.
Nagaeaum man ro LGU Tangalan nga indi eon madugangan ro mga barangay nga maapektuhan.
