KALIBO, Aklan—Limitado sa gihapon ro pasahero it mga nagabyaheng eroplano sa Kalibo International Airport.
Raya hay sa pihak it uman nga pagbalik it mga domestic flights matapos ipaidaeum eun lang sa general community quarantine ro Metro Manila ag iba pang kaeapit nga probinsya.
Suno kay Civil Aviation Authority of the Philippines ukon CAAP-Aklan manager Engr. Eusebio Monserate Jr. nga makarun hay sambilog eamang nga flight kada adlaw ro ginapasugtan sa nasambitan nga paeuparan.
Sandig raya sa ginpermahan nga agreement sa tunga it airline companies ag provincial government.
Ginklaro dugang nga ro mga locally stranded individuals (LSI’s), returning overseas Filipino worker (ROF’s) ag authorize person outside the residence (APOR) eamang ro ginapasugtan nga makabiyahe.
Samtang, hugot man nga ginapatuman ro mga health protocol agud malikawan ro pagtaeapnan it virus.
Gindugang pa kara nga sa makarun hay ginpatuman it taeatapan ro mandatory nga pagsuksok it face shield ag face mask.
