Nag-anunsyo ro Canada it counter-tariffs nga nagaabot sa 50 porsyento sa haeos C$28 bilyon nga kantidad it mga produkto nga halin sa United States bilang sabat sa mga bag-o nga buwis nga ginpataw it US.
Suno kay Finance Minister François-Philippe Champagne, epektibo sa Setyembre 8 ro mga taripa sa mga produkto pareho it asero, muwebles ag bayo agud maprotektahan ro mga trabahador ag negosyo sa Canada.
Nagtuga ro sigalot matapos bukon it madinaeag-on nga negosasyon sa pagbaligya it daywa ka pungsod, nga nagbaeyluhan it akusasyon bangud sa mga ginakabig nga bukon it makatarungan nga mga pangayo.
Nagtaeana man ro gobyerno it Canada it C$7.5 bilyon nga ayuda para sa domestic industries agud malikawan ro maeapad nga pagkaduea it trabaho samtang nagapadayon ro tensyon sa patigayon.
Sa pihak kara, ginpahayag it White House ag ni US President Donald Trump nga ro Canada ro naging bukon it matarong sa mga negosasyon.
Gin-akusar man ni Canadian Prime Minister Mark Carney ro US nga nagatinguha nga gub-on ro mga importante nga industriya it Canada.
Bangud sa nagapadayon nga trade tensions, nagataas ro kahadlok nga magsaka ro presyo it mga baeakeon sa daywa ka pungsod ag mabutang sa peligro ro USMCA free trade agreement.
