Ginkumpirma it Department of Social Welfare and Development (DSWD)-Aklan nga temporaryong naka-hold ro cash grant halin Hunyo hasta Hulyo it kapin sa 87,728 nga 4Ps beneficiary nga natumod nga non-poor sa bilog nga Western Visayas.
Suno kay Beverly Salazar, Provincial Link it DSWD-Aklan nga pagahueaton pa nanda ro resulta it ginpatigayun nga validation para masayuran kung pila ro magapabilin ag eubusan eon nga makakas sa listahan it mga benepisyaryo.
Ginaeauman nga sa buean it Oktobre magaguwa eon ro resulta it validation.
Ro ginbasehan sigon nanda sa pagtumod it mga non-poor beneficiary hay ro resulta it Listahanan 3 nga ginpatigayun ko 2019.
Madumduman nga nauna eon nga nag-anunsyo si Pagueong Ferdinand “Bongbong” Marcos Jr. nga gusto kara nga malimpyuhan ro listahan it 4Ps nga insigida man nga gintuman ni DSWD Secretary Erwin Tulfo.
Nasayuran nga naga-abot sa 1.3 million nga mga benepisyaryo ro target it gobyerno nga mabuoe sa listahan kung siin pagabayluhan raya it mas nagakinahang-ean nga mga pumueoyo.
Samtang sa pihak nga parte, ginklaro ni Salazar nga kada dag-on hay nagapatigayon ro ahensya it data cleansing rason nga kapin sa 700 hasta 800 beneficiaries ro ginakakas sa nasambit nga programa.
Ro iba sigon sa mga raya hay kusang loob nga naga-waive bangud nga may ikasarang eon sanda sa pagpangabuhi.
