KALIBO, Aklan — Magabaton eon it aplikasyon ro Civil Service Commission (CSC) para sa Career Service Examination Pen and Paper Test nga pagahiwaton sa maabot nga Marso 2, 2025.
Suno kay Director Leo Jamorin it CSC-Aklan nga pagabuksan eon ro application period sa mga aspiring civil servants umpisa sa Nobyembre 19, 2024 hasta Enero 3, 2025.
Ro aplikasyon sa eksaminasyon para sa professional ag sub-professional levels hay “first come, first served” basis ag pwedeng ipasarado anumang oras antes ro deadline.
Raya hay igapatuman suno kana sa oras nga naabot eon it CSC Field Office ro target number it applicants.
Pwedeng mag-file ro applicants pinaagi sa CSC Online Civil Service Examination Application System ukon personal appearance.
Sa November 19, 26, 28 ag 29 hay magabaton sanda it aplikasyon sa andang CSC field office samtang sa November 21 ag 22 magabaton sanda it aplikasyon sa banwa it Kalibo sa old division office it DepEd-Aklan.
Sa nobyembre 25 naka schedule sanda nga magbaton it aplikasyon sa ASU New Washington campus ag sa Nobyembre 27 hay sa ASU Ibajay campus.
Para sa buean it Disyembre nga mga schedule hay maghueat it dugang nga anunsyo .
