KALIBO, Aklan—Naeusutan it advance team it civilian mission it Pilipinas ro blockade it mga barko it China ag madinaeag-on nga naka-abot sa gina-agawan nga Scarborough Shoal sa West Philippine Sea.
Raya ro ginpahayag ni Jay-ar Arante, Head it LGU-Kalibo media team base man sa kumpirmasyon it mission organizer nga Atin Ito Coalition.
Natigayon sigon nga madaea it nasambit nga grupo ro ayuda para sa mga mangingisda nga ginaeakipan it pagkaon, bueong ag langis rason nga makabig nga mission accomplished ro andang ginhimo.
Sa pihak nga parte, ginpahayag pa ni Arante nga maskin nga makakoeoba ro andang ginhimo, apang manami sa baeatyagon nga naipakita ro kaaeam, madiskarte ag kaisog it mga Pinoy.
Maskin sigon nga ro andang convoy hay owa eon naka-deretso sa Scarborough Shoal bangud sa nakabantay nga mga barko it China, apang nagapabilin sanda nga bugaeon bangud nga naging kaparte sanda it makasaysayan nga hitabu.
Nasayuran nga bandang alas-7:00 it agahon hay nakabalik eon ro pilang mga empleyado it LGU Kalibo ag mga katapo it media nga nagsunod sa civilian mission.
Naga-abot sa 200 nga mga volunteers ag 100 nga mga mangingisda sakay it limang mabahoe nga motorboat ag 100 nga mga maintok nga fishing boats ro nag-eayag halin sa Masinloc sa Zambales ko Miyerkules it agahon paagto sa Panatag Shoal nga ginatawag man nga Scarborough Shoal ag Bajo de Masinloc.
Antes nga nagbiyahe ro civilian mission, unang nag-eayag ro advance team ko Martes ag naka-abot sanda sa kaeayuon nga 25 hasta 30 nautical miles it palibot it Scarborough Shoal.
