KALIBO, Aklan–Naging madinaeag-on ro ginkasa nga civilian mission it Ati Ito Coalition sa gina-agawan nga teritoryo sa West Philippine Sea.
Raya ro ginpahayag ni Jay-ar Arante, Head it LGU-Kalibo media team matapos nga natuman sigon it grupo kaibahan ro mga volunteers ro andang target nga maipakita sa China ro hilway nga pagparada sa ginakabig nga exclusive economic zone it Pilipinas, pagbutang it mga boya nga may nakabutang nga “WPS is ours” nga nagaserbing symbolic markers sa EEZ it nasyon ag pagtau it bulig sa mga Filipinong mangingisda kapareho it mga pagkaon, bueong ag langis.
Suno kay Arante nga owa eon sanda naka-abanse sa second phase it andang pagbiyahe matapos nga bawaean sanda it barko it Philippine Coast Guard bangud sa presensiya it mga barko it China Coast Guard sa lugar.
Sa baylo hay ro mga contingent it Atin Ito Coalition sakay it daywang mabahoe nga boroto ro nag-deretso paagto sa bisinidad it Panatag Shoal ag Scarborough Shoal ukon Bajo de Masinloc para sa sambilog pang round it pagtau it supply sa mga Filipino nga mangingisda.
Dugang pa ni Arante nga ro civilian mission hay ginaeakipan it limang commercial fishing vessels ag 100 nga mga maintok nga baroto nga pangisda nga nag-convoy kanda.
Naga-abot man sa 200 nga volunteers ro nagpasakop kaibahan sanda sa pagpanguna ni Kalibo mayor Juris Sucro nga naga-isaeahanon nga local official nga maisog nga nagsunod sa misyon.
Daywang barko sigon it PCG ro nagbantay kanda agud nga masiguro ro kaeowasan it civilian mission.
Sa makaron hay una eon sa Olongapo ro grupo ni mayor Sucro ag nakataeana nga magabiyahe pauli it Kalibo.
