KALIBO, Aklan — Gindeklara it Commission on Elections (COMELEC)-Aklan ro andang bilog nga kahauman para sa paeaabuton nga 2025 national ag local elections.
Ginpahayag ni Provincial Election Supervisor Atty. Roberto Salazar nga nakipag-angot eon ro andang taeatapan sa Aklan Police Provincial Office, Philippine Army, Philippine Coast Guard ag Department of Education agud masiguro ro sangka eowas ag matawhay nga proseso it eleksyon.
Nag-abot ag nabaton eon man nanda it kompleto ro mga automated counting machines kaibahan ro mga contingency ACMs ag batteries nga gin-distribute sa 17 nga mga banwa sa Aklan kamana man sa andang technical ag repair hub nga nahamtang sa opisina it provincial election supervisor.
Napanupod eon man sigon ro opisyal nga mga balota ag iba pa nga mga gamit sa eleksyon.
Nakaplastar eon man ro andang voters list ag una eon sa final briefing ro mga magaserbing electoral boards.
Sa pihak nga parte, ginpahayag pa ni Atty. Salazar nga magapatigayon man sanda it final testing and sealing activity it andang automated counting machines sa Mayo 7 agud nga masiguro nga ro tanan nga election machines sa probinsiya hay naga-function it maayos ag accurate sa anang counting capability.
Sa masunod nga domingo hay magapatigayon sanda it andang final meeting kaibahan ro mga natungdan nga ahensiya it gobyerno.
Samtang, padumdum ni Atty. Salazar nga i-exercise ro kinamatarung nga makaboto sa Mayo 12 bangud nga raya hay sangka pribilihiyo ag pag-isipan it mayad ro mga kandidato nga igaboto nga magadumaea sa atong probinsiya ag mga banwa sa masunod nga tatlong dag-on.
