KALIBO, Aklan — Nagapahaum eon ro Commission on Elections (Comelec)-Kalibo sa nagahilapit nga election period nga maga-umpisa sa Enero 12, 2025 ag magatapos sa Hunyo 11, 2025.
Suno kay Atty. Christian Itulid, election officer it Comelec-Kalibo nga igapatuman eon kara ro gun ban rason nga gin laygayan nana ro publiko eabi eon ro mga nagapanag-iya it baril nga iparehistro raya.
Mag-eowas kara, bawae man ro pagdaea it firearms outside residence ukon place of business ag sa mga pampublikong lugar.
Sa raya man nga tiempo suno kana hay iga-implementar ro Comelec checkpoint kun sa siin magiging kabulig nanda ro kapulisan.
Magakinahangean man suno kana it clearance halin sa komisyon ro pagahimuon nga disbursement ag ro pagpadayun it mga naka-pending nga infrastructure projects.
Samtang, masako eon man suno kana ro andang taeatapan sa nakataeana nga training it mga board of elections inspectors (BEIs) nga ginaeakipan it mga teachers ag iba pang technical staff nga magaserbisyo sa adlaw it eleksyon.
Sa pihak nga parte, ginklaru ni Atty. Itulid nga makabig eamang nga kandidato ro mga aspirant nga nagdihon it andang certificates of candidacy (COCs) sa pag-umpisa it campaign period sa Pebrero sa mga national positions ag sa Marso sa mga local positions.
Hasta sa makaron hay owa it sin-o man nga file it withdrawal it andang COCs sa banwa it Kalibo.
