Ginpatigayon kan-o eamang sa banwa it Brezna sa nasyong Montenegro ro dag-unan nga “Lying Down Championship’’.
Raya hay sangka kakaibang kompetisyon kun sa siin paga-koronahan ro pinakamabuhay nga mag-eubog.
Makaron nga ika-12 anyos it kompetisyon, siyam nga contestants ro nag-engkwentruhanay sa pag-eubog kun sa siin ro kompetisyon hay ginpatigayon sa sangka local park sa Brezna.
Sangka eaeaki nga nakilaea kay Zarko Pejanovic ro gindeklarang kampeon matapos imaw nga makabuhay sa pag-eubog sa sueod it 60 oras ukon daywa ag tunga sa adlaw .
Suno kay Pejanovic, mahilig gid man imaw nga mag-einubog sa andang baeay rason nga sisiw eang kana ro 60 oras nga pag-eubog.
Dugang pa kara nga madali eamang raya kana bangud nga ginapasugtan man it organizers it contest nga makaangkon sanda it bathroom break.
Mag-eowas kara, pwede man sanda nga magdaea it mahumok nga mahaea, libro ag cell phone agud nga indi sanda matak-an.
Ro lying down championship hay gin-umpisahan ni Radoje Blagojevic.
Gin-obra nana ro contest bangud sa joke nga ro mga Montenegrins sigon hay mga tamad ag mahilig nga mag-einubog.
Sa makaron nga dag-on , nag uli ro champion nga si Pejanovic it 350 Euros, lunch for two sa sangka maeahaeon nga restaurant, one night stay sa sangka Montenegro ethnic village ag rafting experience.
