Padayon ro imbestigasyon it Kalibo Municipal Police Station sa daywa ka magka-separado nga insidente it pagpanakaw nga natabo sa Veterans Avenue ag Briones Avenue sa banwa it Kalibo.
Suno kay PLt.Col. Jerick Vargas, hepe it nasambit nga taeatapan, natabo ro pagpanakaw sa Veterans Avenue ku Hulyo 10, kun sa siin may mga establisyemento nga ginsueod it mga suspek.
Bisan ginhalughog eon ro sueod it mga tindahan, uwa it nabuoe nga maabo nga kagamitan mageuwas sa sangka Wi-Fi device nga nagabalor it P300.
Base sa backtracking it kapulisan, pito ka indibidwal ro ginapatihan nga imnolbado sa insidente.
Nakilaea eon sigon nanda ro sambilog sa andang mga suspek samtang padayon pa ro pagberipika sa pagkatawo it an-om nga iba pang kaibahan nana ag kon may mga menor de edad nga kaibahan.
Ginhambae man ni Vargas nga uwa pa sa kustodiya it kapulisan ro nakilaea nga suspek bangud naglapse eon ro reglementary period para sa warrant of arrest.
Apang nagahueat ro pulisya sa pormal nga reklamo it mga complainant agud maipasaka ro kaso pinaagi sa regular filing.
Sa separado nga insidente sa Briones nga natabo ku Hulyo 11, ginaimbestigahan man it pulisya ro pagkaduea it mga de-breed nga manok, kaibahan ro Rhode Island Red, halin sa tatlong magkaeapit nga kabaeayan.
Suno kana uwa it CCTV sa lugar, rason para nga magserbe rayang hangkat sa imbestigasyon.
Apang may person of interest eon nga gintutukan ro kapulisan bangud kilaea raya sa lugar ag posible nga may kaangtanan sa insidente.
Sa kabilugan, nakabaton ro Kalibo MPS it masobra waeo ka mga kaso it pagpanakaw sa nag-agi nga mga inadlaw.
Ginpanawagan man ni Vargas sa publiko nga magpabilin nga mapagmatyag, siguraduhon ro seguridad it andang mga panimaeay ag negosyo, ag eagi nga magreport sa kapulisan kon may kaduda-dudang hitabo sa komunidad.
