KALIBO, Aklan – Kapin sa P100,000 pesos ro danyos nga gin-aywan matapos masunog ro sangka panimaeay sa Villa Emelia Sitio Libtong, Brgy. Estancia Kalibo kahapon.
Ro nasambitan nga panimaeay hay ginapanag-iyahan ni Basilio Inojales kung siin kaibahan kara ro anang sambilog nga unga ag anang pamilya.
Sa interview it Bombo Radyo Kalibo kay SFO1 Julius Tiongson it Bureau of Fire Protection (BFP) – Kalibo, nag-umpisa sigon ro kaeayo sa owa mataeupang nga baga maghalin sa andang dapog.
Nagpisik sigon ro baga maghalin sa andang dapog ag dumakop sa dingding nga may kurtina.
Raya ro kabangdanan it madasig nga pagsaka it kaeayo paadto sa andang kwarto sa 2nd floor it panimaeay.
Ginpahayag man ni Tiongson nga himo eamang sa mixed ag light meterials ro baeay kabangdanan nga madasig raya nga natupok it kaeayo.
Nasayuran nga antes natabo ro sunog, nag-eaha it pansit ro magpamilya bangod sa birthday ku sambilog nga miyembro it andang pamilya.
Owa man it mga gamit nga nasalbar ro mga biktima it sunog apang sa mayad man nga swerte hay owa man it may naninahan sa insidente.
Gindeklara man nga fire-out ro sunog alas-3:40 eon it hapon.
