KALIBO, Aklan—Haeos tanan nga mga residente hay nagasunod sa guidelines sa ginapatuman nga granular lockdown sa Sitio Ilaya ag Liboton B sa Brgy. Bakhaw Norte, Kalibo.
Raya ro ginpahayag it sangka residente sa pormal nga pag-umpisa it pagpasarado sa andang lugar.
Kaeabanan suno kana sa mga tawo hay sa sueod eamang it baeay ag nagaguwa eang kon naga sag-ob it tubi sa bomba.
Owa pa suno kana sanda it ideya kon pagkatapos it tatlong adlaw hay magabalik eon sa normal ro andang pagpangabuhi.
Aminado imaw nga malisod ro andang sitwasyon ag apektado ro pangabuhian, apang kinahang-ean nanda nga suportahan ro tikang it local inter-agency task force against covid 19 agud nga indi eon magkalhit pa ro kaso it COVID-19 sa andang lugar.
Kaibahan sigon sanda sa mga ginboe-an it swab sample bangud nga kaeapit-baeay nanda ro staff it Aklan provincial hospital nga nagpositibo sa sakit ag pirme sanda nga nagabakae sa andang baraka.
Madumduman nga gindeklara it Provincial Health Office (PHO) Aklan ro kauna-unahang local transmission matapos nga mag-positibo sa COVID-19 ro sangka sangka babayeng staff it ospital nga residente it nasambit nga lugar.
Nasayuran nga natapnan it pasyente ro 6 pa nga mga katrabaho kara sa ospital nga presenteng naka-facility quarantine sa Brgy. Old Buswang, Kalibo.
Ginpatuman ro lockdown bandang alas-6:00 it gabi i, ko Setyembre 11, ag magabuhay it tatlong adlaw.
Todo bantay sa nasambit nga lugar ro mga katapo it kalibo PNP agud nga masigurong magapabilin sa andang natungdan nga baeay ro mga residente.
Ro mga barangay tanod man ro nagabakae it mga importanteng kagamitan para sa mga residente.
Mag-eowas kara, ginpaeawig pa ro andang curfew hour nga 6:00 PM to 6:00 AM.
