Nakataeanang pasakaan it nagakaigong kaso ro daywang suspek sa pagpamaril nga nag-eontad sa Sitio Manggayad Brgy. Manocmanoc sa isla it Boracay ko nagtaliwan nga Nobyembre 16.
Ginkilaea ni PCol. Don Dicksie De Dios, hepe it Malay Municipal Police Station ro suspek nga sanday PSSgt. Lloyd Raymundo, sangka aktibong pulis nga naka-assign sa Caluya Municipal Police Station it Antique Police Provincial Office nga boluntaryong nagsurender sa pulisya ag si Mark Ramir Perlas, onga ni dating Aklan PPO Provincial Director Col. Ramir Perlas nga nagapabilin pang atlarge hasta sa makaron.
Ro nasambit nga mga indibidwal ro ginaturo nga nagbaril-patay sa biktimang si Benjie Quiatchon, 24 anyos, sangka commissioner, tumandok it Valladolid, Negros Occidental ag presenteng naga-istar sa nasambit nga isla.
Nakilaea ro daywa pinaagi sa mga cctv video kon siin ro gintunaan it insidente hay sangka gulo sa magtimbang nga parte sa sueod it sangka bar.
Ginsakit ro biktima ag kat nakadaeagan paadto sa convenient store hay gin-eagas raya it mga suspek ag dikato eon ginbaril hasta nga binawian it hueam nga kinabuhi.
Matapos ro insidente hay gilayon nga nagpaeagyo ro mga suspek apang makataliwan ro daywang adlaw nagsurender si Raymundo samtang si Perlas hay padayon pang ginatugis it pulisya.
