KALIBO, Aklan — Padayun nga ginabalewala it pilang vendors it Kalibo public market ro gintau nga “September 5” nga deadline it lokal nga gobyerno it Kalibo agud nga magsaylo sa gintaeana kanda nga relocation site sa Kalibo Eastern Side Terminal sa San Lorenzo Drive, Barangay Andagao.
Maskin nga nag-eampas eon ro gintau nga palugit, normal gihapon ro pag negosyo sa tindahan ag padayun nga nagapakamatig-a ro mga vendors nga magapabilin idtu.
Sa interview it Bombo Radyo, ginpahayag ni Rosalia Tampos, presidente it fish section nga may kapaltahan kara ro LGU bangud nga owa pormal nga ginapungkuan ro isyu agud klaru nga mabatian ro andang mga demand.
Aminado man imaw nga nakaangkon sanda it pag-istorya ko nagtaliwan nga adlaw , apang natapos nga owa it kaklaruhan ag pag-ilintidihan.
Dugang pa nga ginaplastar eamang nanda ro andang mga kondisyon ag kinamatarung agud nga maprotektahan ro andang pangabuhian .
Pila sa andang gusto hay makaangkon anay it hard copy it memorandum of agreement, masayuran ro igapatuman nga new rate ag kasiguraduhan nga makabalik sanda sa andang dating pwesto nga owa it anuman nga problema sa oras nga matapos ro construction kaibahan ro mga delingkwente nga stall owners .
Samtang, ginareklamo man nanda ro relocation site nga matsa owa sigon it nagakaigo nga plano ag konsultasyon sa mga stall holders.
Madumduman nga nagpanindugan ro Municipal Economic Enterprise Development Office (MEEDO)-Kalibo nga hasta eon lang sa masunod nga domingo ro pagtinir it mga vendors bangud nga iga-kordon eon nanda ro kabilugan it tindahan agud nga taw-an it daean ro modernization project.
