Bukon it garantiyang epektibong solusyon ro death penalty para mawaksan ro kurapsyon sa nasyon.
Raya ro ginpamilit it Commission on Human Rights (CHR) sa tunga it ginasuoeng nga panukalang batas sa Kamara de Representantes nga House Bill No. 11211 o Death Penalty for Corruption Act, ro penalidad nga kamatayon sa paagi it firing squad para sa mga tiwaling opisyal it gobyerno.
Apisar nga ro intensiyon it gindihon hay agud hadlukon ro public officials agud likawan nga mangurap, nagapati ro CHR nga bukon raya it epektibong solusyon.
Suno sa komisyon, sangka grave offense ro korupsiyon, apang ginpahayag man kara nga indi masabat it nasambit nga bayolente nga penalidad ro problema sa korupsiyon sa baylo hay ginbaeabagan it panukala ro kinahangeanon para sa sistematikong reporma ag ginalihis kara ro pokus halin sa preventative measure kapareho it pagpalig-on it mga mekanismo sa pagsabat ag governance systems.
Nagpadumdom man ro CHR sa House leaders nga ginapagbawae ro death penalty sa idaeom it 1987 Constitution.
