KALIBO, Aklan—Nagaeaum ro sangka coach sa athletics nga mas pang maga-improve ro performance it mga student-athletes halin sa Aklan para sa nagahilapit nga 2024 Western Visayas Regional Athletic Association ukon WVRAA Meet nga maga-umpisa sa Mayo 2 hasta 7 sa Negros Occidental.
Suno kay Jove Ote, coach sa athletics ag sangka manugturo nga ro team Aklan hay magapasakop sa tanan nga 18 nga sporting events sa patag it athletics kun sa siin ro andang mga atleta kaibahan ro iba pa hay nagbiyahe eon kaina it agahon ag haum eon para sumabak sa kompetisyon.
Masadya man nana nga ginbalita nga sa ginpatigayon nga pre-trial ko Biyernes, haeos tanan nanda nga mga events hay nakasueod sa qualifying standard ukon QS nga nagakahueugan nga ro kapasidad it mga atleta hay pwede nga makapasakop sa anuman nga event sa bilog nga nasyon partikular sa Palarong Pambansa.
Ro athletics suno kana ro kaeabanan nga may maabu nga mga kontribusyon pag-abot sa medal tally.
Padayun suno kana ro anang pagpaabot it suporta ag pag-challenge sa mga delegado nga ipa-improve ro andang performace sa makaron nga WVRAA.
Samtang, bangud sa mataas nga heat index sa Negros Occidental, kaibahan sa andang training hay kon paalin nga maka-adopt ag maka-sustain ro mga atleta sa grabeng kainit it paniempo.
Nauna eon suno kana nga gin-adjust ro oras it pahampang it Department of Education ag pagasundon ro health protocols nga ginpatuman ko nagtaliwan nga dag-on kun sa siin owa ginapasugtan ro outdoor games sa katung-anan it alas-10 it agahon hasta alas-3 it hapon agud nga masiguro ro kaeowasan it mga nagapasakop bangud sa mainit nga tiempo.
