KALIBO, Aklan—Nagpanawagan ro Department of Environment and Natural Resources ukon DENR-Aklan sa publiko nga i-turn over ro mga aksidenteng nadakpan nga mga wild species.
Suno kay DENR park maintenance personnel Rex Binang nga indi pag obrahon nga alaga ro mga wild animals ag indi man raya pagkatayon bilang pagkaon.
Gindugang pa kara nga dapat nga itau sa andang taeatapan ro mga nadakpan nga wild species.
Nauna eon nga gin-turn over it Bombo Radyo Kalibo sa DENR-Aklan ro pispis nga brahminy kite eagle ukon mas kilaea sa tawag nga dapay ukon banog.
Raya hay may scientific name nga haliastur indus.
Ro nasambit nga specie hay boluntaryo man nga gindaea nanday Mr. Rey Nabartey ag Ms. Harden Mae Erodias it banwa it banga sa estasyon it Bombo Radyo.
Ro Brahminy Kite eagle hay sambilog sigon sa mga listahan it International Union for Conservation of Nature nga amat-amat eon nga nagasangkiri ro populasyon sa Southeast Asia.
Ginpaathag it DENR-Aklan nga sandig sa Republic Act No. 9147, ro mga madakpan nga nagahupot, naga-transport, ag nagabaligya it wildlife species nga makabig nga endangered ag critically-endangered species nga owa it nagakaigo nga dokumento hay pagakumpiskahon it gobyerno ag may posibilidad nga magapangatubang pa sa kaso.
Ro nasambit nga banog hay gindaea it DENR sa Jawili, Tangalan agud nga paga-alagaan ag kon una eon sa mayad nga kundisyon hay pagabuhian sa kagueangan.
