Kumpiyansa ro top official it Department of Finance (DOF) nga makarekober ro nasyong Pilipinas maghalin sa posibleng maduea nga revenues engkaso man nga pagabawaeon sa nasyon ro Philippine Offshore Gaming Operators (POGOs).
Suno kay Finance Undersecretary Bayani Agabin, posibleng maka-egganyo man it foreign investors ro nasyon sa ibang mga industriya para mabawi ro maduea nga revenues.
Sandig sa datos maghalin sa Bureau of Internal Revenue (BIR) nagaguwa nga ro revenues nga nabubuoe maghalin sa POGOs hay nagabunae sa P4.438 billion umpisa Enero hasta Agosto it presenteng dag-on, mas mataas raya kumpara sa P3.91 billion nga nakolekta para sa full year 2021.
Ginkapos man ro nakolektang revenue ko nagtaliwan nga dag-on sa target nga P32.1-billion.
Suno kay Senator Sherwin Gatchalian nga chair it Committee on Ways and Means nga kung engkaso man nga eubusan eon nga pagabue-on ro POGO sa nasyon hay kapin sa masobra P34.679 billion umpisa sa mga buwis ag non-taxes ro maduea nga revenues it nasyon.
Kaeakip kara ro foregone taxes it P7.485 billion sa retail selling it household equipment ag communications equipment; P3.072 billion sa 25% tax withholding para sa foreign nationals; P4.312 billion sa income taxes; ag P1.583 billion remittances para sa national government ag iba pa.
Suno pa sa senador nga bukon it kinahangean it nasyon ro POGO.
Samtang, gin-anunsiyo man ni Senate President Juan Miguel Zubiri sa nasambit nga pagbasa nga gin-eakip eon it Chinese government ro Pilipinas sa andang blacklist para sa tourist destination bangud sa padayon nga operasyon it POGOs sa nasyon.
