Gin-engganyo ni Department of National Defense Secretary Gilberto Teodoro ro tanan nga mga Pilipino nga sundan ro ginpakita nga kaisog it ginkilaea nga “Ama ng Himagsikan” nga si Andres Bonifacio sa tunga it padayon nga pag-atubang it nasyon sa mga hangkat sa seguridad.
Ginhimo it sekretaryo ro panawagan kahapon para sa pagselebrar it Bonifacio day o ika-161 kaadlawa ni Bonifacio makaron, Nobiyembre 30.
Sa sangka statement, ginpahayag ni Sec. Teodoro nga ro istorya ni Bonifacio nga may mapainubuson nga umpisa hasta nga pangunahan nana ro giyera kontra sa mga mabug-at nga kontra hay nagabilog sa mga personnel it DND nga ginsaligan it mandato para proteksiyunan ro soberaniya ag territorial integrity it Republika it Pilipinas.
Ginpahayag man it sekretaryo nga sa pag-atubang sa pesente ag naga-usbong nga hangkat sa pang-nasyon nga seguridad, kaibahan ro mga pangguwa nga paghana agud samaron ro atong kasarinlan, dapat sigon nga ipadayon ro pagbueo it kaisog ag kalig-on ag pagpalangga sa nasyon ni Bonifacio.
Gin-engganyo man it DND chief ro mga Pilipino nga magtao it pagkilaea sa legasiya ni Bonifacio paagi sa pagprotekta sa kaeuwasan, ikamayad ag kahilwayan it mga pumueuyong Pilipino kun siin kabuhi ro gintao nanday Bonifacio ag iba pa nga mga baganihan it mga nagtaliwan nga henerasyon.
Bilang nagtindog it Katipunan, nadag-an sigon ni Bonifacio ro kahilwayan sa pagpang-api, pagkapareho-pareho ag pagbawi it dignidad it mga nagtiis it pilang dekadang pagmamayani it kolonyalismo.
