KALIBO, Aklan—Nagapatigayon eon it blended learning ro pilang eskwelahan sa banwa it Malay kaibahan ro isla it Boracay bangud sa mainit nga tiempo nga naexperiensiyahan sa atong nasyon.
Suno kay Mr. Bryan Ray Solano, tagapaghambae it Department of Education ukon DepEd district of Malay nga gintaw-an it gahum it DepEd central office ro mga eskwelahan nga magkansela it face to face classes sa hapon ag magpatigayon it modular learning.
Gin abisuhan sigon ro mga principal ag school heads angot kara.
Ginkasugtan nga kada agahon eamang makaangkon it in-person classes ag sa hapon hay modular learning agud nga makalikaw sa sobrang init eabi eon kun nakakaapekto eon ro tiempo sa ikamayad nga eawas it mga estudyante ag manugturo.
Ro mandu sigon it DepEd central office hay nagadepende sa presenteng kahimtangan it sangka eskwelahan kun sa siin pila sa ginataw-an it konsiderasyon hay ro size ag ventilation it classroom, numero it mga estudyante ag iba pa.
Ginklaru man kara nga may pilang eskwelahan gihapon sa Malay ro nagapatigayon it whole day nga in person classes bangud sa sangkiri eamang ro andang mga estudyante ag may mga lugar nga mahandong nga pwedeng klasehan.
