Inaprubahan ng Department of Budget and Management (DBM) ang kahilingan ng Department of Education (DepEd) para sa 20,000 bagong posisyon ng guro sa 2025, alinsunod sa direktiba ni Pangulong Marcos Jr. na itaas ang kalidad ng edukasyon sa bansa.
Kabilang sa mga posisyon ang Teacher I, Special Needs Education Teacher (SNET), at Special Science Teacher I, na ipapamahagi sa mga rehiyon. Pinakamalaki ang alokasyon sa Region IV-A, Region III, at Region VII.
Ayon kay Education Secretary Sonny Angara, layunin ng hakbang na ito na maibsan ang bigat ng trabaho ng mga guro at maabot ang mas maraming mag-aaral.
Mula Agosto 2024 hanggang Abril 2025, bumaba ang bilang ng mga bakanteng posisyon mula 72,964 hanggang 38,862, na nagresulta sa 96.03% na national filling rate. Pinabilis ang proseso ng deployment gamit ang NOSCAs mula sa DBM na ipinamahagi sa mga Schools Division Offices.
Kasama sa reporma ng DepEd ang pagtaas ng teaching allowance sa ₱10,000, mas malinaw na workload policies, at karagdagang oportunidad para sa promosyon.
