KALIBO, Aklan–Ginpasiguro it Department of Education ukon DepEd District of Malay nga haum eon ro andang mga pampublikong eskwelahan para sa pagbalik it face-to-face classes sa Agosto 22 sa idaeaum it “OPLAN Balik Eskwela” nga opisyal nga paga-umpisahan sa Lunes nga adlaw.
Suno kay Mr. Bryan Ray Solano, Public Information Officer it DepEd-Malay nga ko nagtaliwan nga Agosto 1 hay gin-umpisahan ro Brigada Eskwela kun sa siin makabig raya nga madinaeag-on bangud nga haeos 90% ro participatory rate it mga stakeholders.
Sa makaron hay padayun pa sigon sanda nga nagahueat it pinal nga guidelines sa central office sa mga kinahangeanon nga obrahon sa pag-shift halin sa blended learning nga set-up paagto sa limang adlaw nga in-person classes, eabi pa ag nagapangatubang gihapon ro nasyon sa pandemya nga daea it COVID 19.
Ginpasiguro man ni Solano nga igapabilin nanda ro pagbantay sa minimum health protocol.
Naga-abot eon man sa 98% ro andang enrollment kun sa siin ro ginahueat pa nanda hay ro mga maga-transfer sa andang eskwelahan nga mga unga it mga workers sa Boracay eabi pa ag nagbukas eon ro isla sa turismo.
