KALIBO, Aklan—Kumpiyansa ro Department of Education ukon DepEd-Malay sa kahauman it tanan nga mga eskwelahan sa andang distrito sa pagbalik it face-to-face classes sa masunod nga pagbukas it klase para sa school year 2022-2023.
Suno kay Bryan Rey Solano, tagapaghambae it DepEd-Malay ag School Head it Nabaoy Elementary School nga haeos tanan nanda nga pampublikong eskwelahan hay nataw-an it permit agud nga magpatuman it limited face to face classes ko Hunyo.
Magapatigayon gihapon sigon sanda it blended learning sa Agosto 22 hasta sa transition kara sa full-blown face to face classes sa Nobyembre 2.
Umpisa sa Lunes, Hulyo 25 hasta Agosto 22 hay maga-umpisa sigon ro enrollment samtang sa Agosto 1 hasta 26 hay magapatigayon it Brigada Eskwela nga ginakabig nga maintenance week bilang pagpahaum sa pagbukas it klase.
Samtang, bukon man it pabor si Mr. Solano sa mga proposisyon nga ipaisoe ro pagbukas it klase bangud nga maapektuhan sigon kara ro number of school days nga nakabaehag sa RA 11480.
Sa makaron hay owa pa sigon it panibag-ong guidelines nga ginpaguwa ro DepEd angot sa pagpatigayon it face to face classes.
Sa pihak kara, padayun sigon nanda nga ginasunod ro public health protocols kun sa siin kinahangean nga limitahan sa hasta sa ap-at nga oras ag tunga ro klase ukon contact time , physical distancing , pagsuksok it face mask ag interval sanitation.
Posible man sigon nga ipatuman ro shifting method eabi eon sa isla it Boracay kun sa siin maabu ro mga estudyante.
Ro banwa it Malay hay may kabilugan nga 16 nga eskwelahan.
Sa pihak nga parrte, ginpahayag pa ni Mr. Solano nga ginasunod nanda ro mandu nga indi pag-obligahon ro mga estudyante nga mag-uniform, apang gina-engganyo ro tanan nga magsuksok gihapon kara kon may andang available nga school uniform.
Gina-practice sigon kara ro mga estudyante nga maging disente ag malimpyo.
Hugut man nanda nga ginapatuman ro “no collection policy”.
