KALIBO, Aklan—Gindayaw it Department of Education ukon DepEd region 6 ro andang mga atleta bangud sa impresibong performance nga ginpakita sa bag-o eamang natapos nga Palarong Pambansa 2023.
Suno kay DepEd region 6 spokesperson Hernani Escullar Jr., nga makabig nga mabahoe nga kadaeag-an ro pagiging first runner-up it Western Visayas sa over-all ranking matapos nga humakot it 60 gold, 45 silver ag 44 bronze medals.
Naeampasan sigon kara ro dating record sa gold medal tally kun sa siin ko 2019 nakabo-oe eamang it 49 gold medals.
Dikara sigon mapamatud-an nga ro region 6 hay “home of the champions” ag ginahalinan it mga mayad nga atleta.
Mag-eowas sa mga atleta, ginpasaeamatan man it DepEd region 6 ro mga naging kaparte it andang delegado kapareho it mga coaches ag manugturo, chaperones ag iba pa nga naging daean it pagmadinaeag-on it andang pagpasakop sa sporting event.
