KALIBO, Aklan—Haom eon ro deployment plan it Aklan Provincial Disaster Risk Reduction Management Office ukon PDRRMO angot sa nagahilapit nga Semana Santa.
Suno kay Aklan PDRRMO head Mr. Galo Ibardolasa, posibleng igadeploy ro andang personnel sa Manduyog Hills sa banwa it Banga bangud nga raya ro bukid nga masaming ginadagsa it maabong mga deboto.
Samtang ro mga MDRRMO’s hay mismong sa andang natungdan nga banwa ro deployment para mag-assist sa mga deboto nga magaatendir it misa, prosisyon ukon via crusis.
May kaangtanan kara, nagpadumdom man si Ibardolasa sa publiko nga kon maeain ro pamatyag hay inde eon magpilit nga magtukad pa sa bukid para magpatigayon it via crusis.
Magdaea it panangga sa silak it adlaw ag permi nga mag-inom it tubi agud nga malikawan ro dehydration.
