Kasado eon ro deployment team it Municipal Disaster Risk Reduction Management Office ukon MDRRMO para sa opening salvo it Kalibo Sto. Niño Ati-Atihan Festival 2023 makaron nga adlaw it Sabado, Oktobre 8.
Suno kay MDRRMO Kalibo head Mr. Terrence June Toriano, ro andang deployment hay una sa four corners it pastrana park maeapit sa mga gintaeana nga police assistance center.
Nakapattern sigon raya sa deployment man it Kalibo municipal police station kon siin kabulig nanda ro Auxillary Police ag Bureau of Fire Protection ukon BFP emergency response team.
Ro andang preparasyon hay gin-antisipar eagi it mga raya ro mga nagkaeain-eain nga insidente agud nga gilayon nga makaresponde.
Ginaeauman suno kana nga pagadagsaon it maabong tawo ro opening salvo bangud nga excited ro mga raya matapos ro haeos daywang dag-on nga pagpaiway sa nasambit nga selebrasyon.
Agud nga maging matawhay ag masadya ro selebrasyon, panugyan ni Toriano sa publiko nga inde magmanaheo it behikulo kon una sa impluwensya it aeak bangud nga raya ro nagapangunang rason it mga aksidente sa daeanon.
Samtang sa pihak nga parte, ginpadumdom man kara ro tanan nga antes nga aywanan ro panimaeay hay sikyaron ro mga appliances kon nakahukas sa saksakan ag i-lock it husto ro mga baeay para makalikaw sa sunog ag manakaw.
