KALIBO, Aklan—Ginpasiguro it pamunuan it Department of Public Works and Highways ukon DPWH-Aklan nga paga-aksyunan ro natiphag nga parte it revetment wall sa Brgy. Daja Sur, Banga.
Suno kay Engr. Joey Ureta, head it maintenance division it DPWH-Aklan nga naka-abot eon sa andang igtaeupangod ro nasambit nga problema matapos nga personal nga nag-agto sa andang opisina ro punong barangay it nasambit nga lugar.
Nasayuran nga ro pagkasamad it portion it revetment wall hay nauna eon nga gin-post sa social media it pilang concerned citizen.
Gindugang pa ni Engr. Ureta nga matapos nga nagka-istorya sanday DPWH-Aklan District Engineer Gener Abergas ag punong barangay jimmy roveras hay insigida nga nagpatigayon it inspection ro taeatapan.
Apang owa pa sigon nana nabaton ro report angot sa extent of damage ag kon ano ro ginhalinan.
Sa pihak kara, may nakaplastar eon nga plano ro taeatapan ag paga-umpisahan ro pagtambak bilang temporary solution sa oras nga makaangkon it mayad nga paniempo agud nga indi eon magbahoe ro samad.
Posible suno kana nga sa masunod nga dag-on paga-umpisahan ro repair kon makataeana it panibag-ong pondo ro maintenance division.
Madumduman nga pilang mga residente ro nangawa sa pagkatiphag it revetment wall sa pihak nga owa man it may naexperiensiyahan nga bagyo ukon baha.
Ko buean sigon it pebrero it makaron nga dag-on hay ginpaabot sa DPWH ro nataeupangdan nga maisot nga buho maeapit sa natiphag nga revetment wall.
