KALIBO, Aklan—Nakataeana eon nga paga-umpisahan ro bidding process para sa construction it nasamad nga revetment wall sa Brgy. Jumarap, Banga.
Suno kay Engr. Joey Ureta, maintenance head it Department of Public Works and Highways ukon DPWH-Aklan nga posibleng sa Enero 26, 2023 pagahiwaton ro bidding process agud nga matumod ro construction company nga magabuyot sa proyekto.
Raya hay kasunod it pagkabaeaka it pilang mga residente partikular ro mga naga-istar sa kilid it suba nga sakop it Aklan river bangud sa padayun nga pagkatiphag it eugta matapos ro naexperiensiyahan nga mga grabeng pagbaha sa pag-agi it nagtaliwan nga mga bagyo.
Gindugang pa ni Engr. Ureta nga ro pondo nga naga abot sa kapin sa P20-milyon pesos hay halin sa taeatapan ni Aklan 1st district congressman Carlito Marquez sa idaeum it 2023 General Appropriations Act ukon GAA.
Sa makaron hay ginahueat eon lang nanda ro Special Allotment Release Order ukon SARO agud nga maumpisahan eon ro proyekto.
Sa pihak nga parte, gindugang pa ni Engr. Ureta nga padayun ro andang maintenance works sa mga ginareklamo nga potholes ukon buho-buho sa mga national highway maskin nga limitado ro andang budget.
Nagapangunang sabeag sigon sa andang trabaho hay ro weather condition, kun sa siin sigidas ro naexperiensiyahan nga mga pag-uean-uean.
Bago suno kana ro selebrasyon it Kalibo Sto. Niño Ati-Atihan Festival hay natigayon nanda nga ma-repair ro mga karsadahon partikular ro mga karsadahon paarto sa Kalibo International Airport.
Kaibahan sa gintaw-an nanda it prayoridad hay ro karsada paagto sa werstern side bangud sa mga turista nga naga-agto sa Boracay kamana man ro portion it Kalibo-Numancia bridge nga nasamad.
Mag-eowas kara, ginatutukan man nanda ro mga national highway nga sakop it Kalibo to Banga ag Banga to Altavas.
