Kalibo Aklan ———-Ginpahayag it Department of Public Works on Highways (DPWH) –Aklan nga nakalista sanda it pilang ka mga damages sa imprastraktura partikular ro mga sea walls, government walls ag flood control projects ko nagtaliwan nga pagpanaeasa it Bagyong Agaton.
Raya hay apisar nga owa nakaibahan ro probinsya sa mga lugar nga gin-agyan it nasambitan nga Bagyo.
Suno kay Engr. Joey Ureta, Head it Maintenance Division it DPWH–Aklan nga nagpatigayon eun sanda it monitoring sa mga nailistang kasamaran sa imprastraktura.
Ginlista man sigon nanda raya sa andang damage report agud nga makaibahan sa andang igaproponer nga budget sa dag-on 2023.
Sa pihak nga parte, ginpahayag man ni Engr Ureta nga owa nagapabaya ro DPWH agud nga maayos ro mga pathole ukon buho-buho sa pilang ka mga karsadahon sa probinsya.
Dugang pa kara nga nagahueat eamang sanda it manami nga paniyempo agud nga magtayuyun ro andang pag-ayos it karsada.
