Natukiban it mga awtoridad sa Germany nga ro drone nga nakit-an maeapit sa mga Ukrainian cargo aircraft sa Leipzig/Halle Airport hay may nakakabit nga high military-grade explosive device, samtang ro sangka Ukrainian cargo aircraft hay may kargang military ammunition, base sa sangka confidential police report.
Suno sa paunang imbestigasyon, owa sumabog ro explosive device bangud sa gina-alegar nga technical defect. Bangud kara, mas ginpabaskog it mga awtoridad ro counterterrorism investigation sa Leipzig/Halle Airport, nga nagasirbing nagapangunang cargo hub ag NATO military logistics center it Germany.
Ginakabig ni German Interior Minister Alexander Dobrindt ro insidente bilang sangka “hybrid attack” nga nagapakita it nagabahoe nga paeag sa seguridad it nasyon. Nakataeana man imaw nga makipagpueong sa mga opisyal it pilang nasyon sa Europa agud nga talakayon ro pagpabaskog it andang depensa ag kooperasyong militar.
Padayun man nga ginatumod it mga imbestigador ro iba pang detalye it insidente, kaibahan ro ginhalinan it mga debris it sangka owa pa natumod nga bagay nga tumama man sa sambilog pang cargo aircraft. Nakaangkon it sangkiri nga kasamaran ro nasambit nga eroplano apang eowas raya nga nakatugpa sa Hanover matapos magpatigayon it go-around maneuver.
Temporaryo nga ginsuspinde ro operasyon sa Leipzig/Halle Airport ag gin-divert ro ilang flight, kaibahan ro mga eroplano it DHL. Naibalik eon man sa normal ro operasyon it paeuparan samtang nagapadayun ro imbestigasyon. Owa pa it natumod nga suspek sa insidente.
