KALIBO, Aklan—Nakapanupod eon ro Department of Social Welfare and Development ukon DSWD Region 6 it bulig nga nagabalor it kapin sa P68.8 million pesos sa mga pamilya nga apektado it El Niño phenomenon sa Western Visayas.
Suno kay Robert John Lacuesta Hilario, information officer II it disaster response management division it DSWD Region 6 nga base sa andang datos, nakapaguwa eon sanda it 108,873 nga food packs para sa mga pamilya sa nagkaeain-eain nga siyudad ag banwa sa rehiyon.
Ro Aklan hay nakabaton it 10,707 nga family food packs nga katumbas it P6.9 million.
Apang may pilang banwa pa sigon nga nakikipag-angot sa andang ahensiya para sa dugang nga ayuda.
Agud nga masiguro suno kana ro padayun nga pag-release it assistance, nakikipag-coordinate ro andang taeatapan sa iba pang natungdan nga local government units.
Pila sa mga nataw-an it ayuda mag-eowas sa mga nasamaran it mga pananum ag alagang kasapatan hay ro mga pamilya nga naduea-an it maboe-an it supply it tubi nga pwedeng mainom.
Sa makaron, ro banwa pa eamang it Ibajay sa Aklan ro nagdeklara it state of calamity tuga it El Niño.
Dugang pa ni Hilario nga ro probinsiya it Iloilo ro nakalista it mabahoe nga kahalitan tuga it nasambit nga weather phenomenon nga ginsundan it Antique ag Negros occidental.
Samtang, may sueod suno kana ro family food packs nga bugas, mga lata it sardinas, carne norte ukon beef loaf, pilang sachet it kape ukon cereal energy drink nga pwedeng makonsumo sa sueod it daywang adlaw.
