KALIBO, Aklan—Sa pagpanaeasa it Bagyong Basyang, nag-aywan raya it halit sa mga apektadong lugar sa nasyon kon sa siin nawad-an sanda it pangabuhian, nagkaeasamad ro andang panimaeay ag kapin sa 12 ro binawin it pinalangga sa kabuhi partikular sa rehiyon it Mindanao.
Angot kara, maskin uwa direktang tinamaan ro Western Visayas, apang nagtuga it pagbaha sa pilang probinsya ro pagbuhos it mabaskog nga uean nga insigida man nga gin-ayudahan it Department of Social Welfare and Development ukon DSWD region VI ro mga apektadong residente.
Suno kay Angelo Miranda, information officer it nasambit nga ahensya, base sa ginpaguwa nga dromic report, adlaw it Sabado, Pebrero 7, bandang alas- 4:00 it hapon, umabot sa siyam nga ka banwa sa Western Visayas ro apektado.
Ginakomponeran raya it 19 nga barangays nga may 1,926 nga apektadong pamilya ukon 5,604 indibidwal.
Bangud kara, nagaabot sa P1,214,725 pesos nga haega it family food packs ro andang gin-ayuda sa mga apektadong pamilya.
Sa makaron hay padayon pa ro andang pagconsolidate it report maghalin sa iba pang kabaryuhan sa rehiyon.
Ro DSWD Western Visayas hay may available pang resources nga nagaabot sa masobra P142 milyon pesos kon sa siin P3 milyon pesos kara ro standby funds samtang masobra mat-a sa P139 milyon pesos ro haega it standby food ag non- food items.
